Kujtojmë sot me rastin e 148-vjetorit të lindjes poetin popullor arbëresh, Salvadore Braile (1872-1961). Ai lindi me 12 maj 1872, në San Demetrio Korone, një prej qendrave më të rëndësishme intelektuale arbëreshe, njëkohësisht qendër e kolegjit të famshëm San Adriano.
Braile ndoqi studimet në këtë kolegj, por thuhet se i ndërpreu studimet për shkak të vështirësive ekonomike. Më vonë, duke punuar si telegrafist, arriti të siguronte të ardhurat që të paguante kurse letërsie dhe të përfundonte, në këtë mënyrë, studimet liceale.
Nga viti 1924-1926 u emërua nga Ministria e Arsimit si mësues i letërsisë në Shqipëri, në gjimnazin e Françeskanëve në Shkodër, drejtor i të cilit ishte Gjergj Fishta.
Braile e admironte gjuhën shqipe, gjë që i kishte nxitur dëshirën për t’u marrë me përkthime nga italishtja.
Përveçse spikati si poet lirik e satirik, ai shkroi edhe krijime origjinale prozaike. Më 1924, botoi në Shkodër përkthimin bashkë me tekstin shqip origjinal të veprës ”Komedianti-Satira për të ndershmit e San Mitër Koronës”, të poetit popullor Kostandin Beluçi. Ndërsa vepra e tij më e njohur është përmbledhja poetike “Ndërmjet një telegrami dhe një tjetri”. Në vijim, mund të lexoni disa nga poezitë e këtij autori.
Albanian 
English 