Ka nisur sot me datë 21.11.2022 veprimtaria “Ditët e Librit Arbëresh” e organizuar nga Qendra e Studimeve dhe Publikimeve për Arbëreshët (QSPA) në ambientet e Fakultetit të Gjuhëve të Huaja, në Sallën “Europa”. Në fjalën hapëse, drejtoresha ekzekutive e QSPA, Prof. Diana Kastrati, ka falenderuar studiuesit arbëreshë të pranishëm në këtë veprimtari dhe ka theksuar se është hera e parë që i jepet një hapësirë kaq e gjerë përfaqësimi studiuesve arbëreshë, për të shpalosur veprat dhe punën e tyre shumëvjeçare.
Më pas, fjalën e mori zv/ministrja e Punëve të Jashtme, Znj. Artemis Malo, e cila theksoi punën e jashtëzakonshme të bërë nga QSPA, ku vlerësoi botimet e realizuara nga ky institucion. Po ashtu, ajo e vlerësoi aktivitetin e sotëm si një dëshmi të vullnetit të mirë të përbashkët, për të përforcuar lidhjet, e marrëdhëniet e vërteta e shpirtërore të shqiptarëve me vëllezërit italo-shqiptar.
Më tej, vijuan me fjalët përshëndetëse Drejtori i Institutit Italian të Kulturës, Z. Alessandro Ruggera, i cili theksoi rëndësinë e bashkëpunimit mes Institutit Italian dhe QSPA, ndërsa Dekania e Fakultetit të Gjuhëve të Huaja, Prof. Esmeralda Kromidha theksoi rëndësinë e ruajtjes së rrënjëve të identitetit pavarësisht vendit ku jeton.
Më pas, të pranishmit në veprimtari vizituan ambientet e sallës “Rozafa” të bibliotekës ku ndodheshin ekspozitat: e para, me 500 libra të dekadave të fundit të sjella nga vetë arbëreshët, pjesa më e madhe e të cilëve do t’i dhurohen bibliotekës së QSPA-së; ekspozitën me fotografi mbi jetën e gruas arbëreshe dhe e treta me krijime, fotografi të realizuara nga artistja e re arbëreshe, mbi Danten dhe udhëtimin e tij.
