Sot është ditëlindja e Gianni Belluscio-s, gjuhëtarit, profesorit dhe studiuesit të njohur arbëresh, i lindur më 25 gusht 1961, e që humbi jetën në prill të këtij viti. I specializuar në fonetikë, fonologji dhe njohës i mirë i dialektologjisë së gjuhës shqipe, ai la pas një numër të lartë studimesh dhe projektesh, të cilat janë vlerësuar me konsiderata prej rrethit të profesionistëve ku bënte pjesë, në Itali, Shqipëri e të gjitha trevat shqipfolëse, por edhe më gjerë.
Është cilësuar si studiuesi që u jepte jetë tingujve, pasi me mikrofonin e tij dhe aparatin e regjistrimit të zërit, grumbullonte nga zonat e ndryshme ku flitej shqipja nuancat e shqiptimit të saj, ngjyrimet e tingujve të rrallë fonetikë, studimin e të cilëve e ngrinte më tej në nivelin më të lartë akademik. Punën e tij më tej e shtrinte nëpër arkiva, nga ku rikthente në vëmendje fjalët e harruara. Por Belluscio nuk kufizohej në studimet e tij, vepra e tij poliedrike shtrihej edhe në leksikologji, leksikografi, sociolinguistikë, analizë teksti, kritikë, letrare, antropologji kulturore, filologji, gjuhësi historike. Ishte bashkautor i Fjalorit të termave të gjuhësisë në katër gjuhë, si dhe i veprës në proces mbi toponiminë kalabreze. Është ideatori dhe krijuesi i Laboratorit të Fonetikës në Universitetin e Kalabrisë, nga ku nxiti dhe studimet eksperimentale për shqipen, e veçanërisht të folmen arbëreshe.
Albanian 
English 