Grupi muzikor arbëresh “Shega” ka zhvilluar sot një vizitë në Qendrën e Studimeve dhe Publikimeve për Arbëreshët (QSPA) për t’u njohur me veprimtarinë e këtij institucioni. Në kuadër të turneve të tyre artistike në Kosovë dhe Shqipëri, grupi “Shega” ka zhvilluar edhe disa vizita zyrtare, me qëllimin për t’u njohur nga afër me vendin amë. Sot ata u pritën nga stafi i Qendrës së Studimeve dhe Publikimeve për Arbëreshët dhe u njohën me botimet e deritanishme dhe me disa nga veprimtaritë e zhvilluara deri më tani nga ky institucion, i cili është i vetmi në trojet shqiptare që është i specializuar për studimin e historisë, gjuhës dhe letërsisë arbëreshe.
Grupi muzikor arbëresh “Shega” përbëhet nga pesë të rinj arbëreshë prej ngulimit “Hora e Arbëreshëvet”, të cilët janë bërë bashkë në sajë të pasionit për muzikën dhe për gjuhën e mëmës, të ruajtur prej gjashtë shekujsh. Ata kanë treguar për stafin e QSPA-së idenë e themelimit të grupit, si dhe mënyrën sesi i realizojnë këngët e tyre.
Ata do të promovojnë sonte albumin e tyre të parë në një koncert live, i cili do të mbahet në orën 20.00 te “Reja“ në Tiranë.
Koncerti organizohet nga Agjencia Kombëtare e Diasporës me mbështetjen e Ministrit të Shtetit për Diasporën, në kuadër të ruajtjes dhe promovimit të kulturës dhe traditave kombëtare.
Aktivitet i Qendrës së Studimeve dhe Publikimeve për Arbëreshët (QSPA) me rastin e 120-vjetorit të vdekjes së shkrimtarit Jeronim De Rada
Qendra e Studimeve dhe Publikimeve për Arbëreshët (QSPA) në bashkëpunim me Qendrën Kombëtare të Librit dhe Leximit (QKLL) zhvilluan një...
