Kryetari i Federatës së Shoqatave Arbëreshe (FAA) dhe një nga aktivistët më të mëdhenj të çështjes arbëreshe në Itali, eseisti dhe shkrimtari Damiano Guagliardi sot mbush 70 vjeç. Me këtë rast, përmendim disa nga momentet më të rëndësishme të jetës së tij. Lindi me 27 shtator të vitit 1950 në San Demetrio Corone të Kalabrisë. Pas përfundimit të Liceut Klasik në vendlindje, nisi studimet univeristare në Urbino në degën e Sociologjisë. Mes viteve 1976-1982 kryen detyrën e Këshilltarit Komunal në San Demetrio Corone, njëherësh duke mbajtur edhe rolin e ministrit rajonal. Në vitin 2000 u rikthye sërish në këto funksione për disa legjislatura, duke kryer edhe funksionin e Nënkryetarit të Këshillit të Posaçëm kundër fenomenit mafioz në Kalabri.
Gjatë karrierës së tij, ka mbajtur disa pozicione drejtuese, ku vlen të përmendim: Këshilltar Rajonal i Turizmit dhe Trashëgimisë Kulturore në përgjithësi për Minoritetet dhe Migracionin, President i Komisionit Teknik për Agjencinë Kombëtare të Turizmit dhe së fundmi, ka themeluar dhe drejton Federatën e Shoqatave Arbëreshe (FAA), Shoqatë e cila ka qenë tepër bashkëpunuese me Qendrën e Studimeve dhe Publikimeve për Arbëreshët (QSPA) në Tiranë. Madje, pak javë më parë është nënshkruar edhe një marrëveshje zyrtare për bashkëpunim të ndërsjelltë institucional, me qëllim shkëmbim materialesh arkivore e studimore, si dhe bashkëpunime të tjera në projekte kërkimore-shkencore.
Ai është autor i shtatë librave artistikë dhe autor i dhjetëra artikujve me karakter publicistik e shkencor, kryesisht mbi probleme të mprehta politiko-sociale.
Burimi origjinal: http://www.ferrarieditore.it/…/autori/damiano-guagliardi/
Albanian 
English 