[vc_row][vc_column][vc_column_text]
Qendra e Studimeve dhe Publikimeve për Arbëreshët (QSPA) në bashkëpunim me Departamentin e Gjuhësisë të Fakultetit të Historisë dhe të Filologjisë në Universitetin e Tiranës organizuan sot veprimtarinë e radhës me temë: “Giovanni Belluscio, kontributi i poliedrikut arbëresh të kohëve tona”.
Takimi online nën drejtimin e studiueses Vilma Proko nxori në pah kontributin e shumëfishtë të këtij personaliteti të botës arbëreshe, me rastin 1-vjetorit të largimit të tij nga jeta. Në takim morën pjesë me kumtesat e tyre studiuesit e mirënjohur: Prof. Shezai Rrokaj, Prof. Aljula Jubani dhe prof. Klara Kodra. Takimin e përshëndetën edhe prof. Dhori Qiriazi nga Universiteti i Selanikut, si dhe poeti e studiuesi arbëresh Mario Bellizi.
Profesor Shezai Rrokaj u shpreh se “kjo është një nismë shumë interesante për të kujtuar një njeri shumë të dashur dhe atë çfarë ai i ka dhënë shkencës në tërësi. Giovanni është një figurë e rëndësishme kombëtare me vlerë të jashtëzakonshme. Jam shumë krenar për gjithçka që ai solli. Giovanni përcillte mençuri tek të tjerët, ishte shkollë mendimi. Bashkë hartuam një fjalor, sepse e ndjenim që gjuhës shqipe i mungonte një fjalor i tillë. Laboratorit të fonetikës në departamentin e Gjuhësisë i kemi vendosur emrin e Giovanni Belluscio në shenjë respekti.”
Profesoresha Aljula Jubani në kumtesën që kishte hartuar në bashkëpunim me studiuesen Emilia Conforti bëri një prezantim të të gjithë kontributit të Gianni Belluscio-s në fushën e fonetikës dhe theksoi se “Belluscio investoi kompetencat e tij për të mbrojtur gjuhën shqipe në shumë universitete në Itali dhe në vende tjera europiane”.
Ndërsa studiuesja Klara Kodra solli kontributin e Gianni Belluscio-s si historian i letërsisë dhe kritik letrar për veprën e Santorit.
I përlotur për humbjen e kushëririt dhe mikut të tij, poeti arbëresh Mario Bellizzi foli për punët e Gianni Belluscio-s: “Unë me Giannin ishim kushërinj, jemi rritur bashkë, unë isha më i madh se ai. Kishim një shoqatë bashkë në katund dhe çdo ditë flisnim për nisma të reja. Kam folur me të në telefon dy ditë para vdekjes dhe me gjithë problemet që kishte ai më tha disa gjëra krejt të tjera. Më tha kam një fletore me poezi dhe ruaje ti. Unë e ndërpreva dhe i thash se për momentin fokusohu tek shëndeti, por ai vazhdoi. Vdiq në rrethana dramatike shumë të ngatërruara, por la pas një kontribut të vyer në institucionet akademike.”
Profesor Dhori Qiriazi nga Universiteti i Selanikut, duke vënë theksin në kontributin e Gianni Belluscio-s mbi studimin “Greqizmat në të folmet arbëreshe: dëshmi dhe histori të kontakteve gjuhësore” tregoi edhe mbi faktin se pati biseduar me Giovanni Belluscio-n për të hartuar së bashku një studim mbi greqizmat, por ky projekt mbeti në tentativë.
[/vc_column_text][/vc_column][/vc_row][vc_row][vc_column][vc_single_image image=”1867″ img_size=”full” alignment=”center”][/vc_column][/vc_row]
