Drejtoresha ekzekutive e Qendrës së Studimeve dhe Publikimeve për Arbëreshët (QSPA), prof. Diana Kastrati, në kuadër të vizitës zyrtare në Prishtinë, ka zhvilluar një sërë takimesh e marrëveshjesh bashkëpunimi. Mes të tjerash, veçojmë takimin në mjediset e Institutit Albanologjik të Prishtinës (IAP), ku prof. Kastrati së bashku me studiuesen Vilma Proko janë takuar me Sekretarin Shkencor të IAP-së, prof. Lulëzim Lajçi dhe përgjegjësin e sektorit të gjuhësisë pranë këtij institucioni, prof. Qemal Murati. Palët përfaqësuese të të dyja institucioneve kanë diskutuar në parim pikat dhe hapësirat e bashkëpunimit ndërinstitucional dhe konkretizimin e tyre edhe zyrtarisht në takimin e radhës.
Po ashtu, në kuadër të miqësisë dhe bashkëpunimit të mëtejshëm me institucionet kërkimore-shkencore u zhvillua takim zyrtar edhe në Institutin e Kosovës për Mbrojtjen e Monumenteve. Përfaqësuesit e këtij institucioni rezervuan një pritje tepër miqësore në mjediset e bibliotekës. Studiuesit Qazim Namani, Emin Sallahu dhe përgjegjësja e bibliotekës, znj. Arbërie Demaçi bënë një prezantim të gjerë të botimeve të këtij Instituti, ku theksuan edhe fokusin kryesor të punës së tyre në rivlerësimin dhe mbrojtjen e monumenteve të kulturës kombëtare shqiptare.
[envira-gallery id=”580″]
