Në ndarjen e çmimeve të konkursit “KRENARBËRIA”, të zhvilluar në mjediset e “Social HUB-Training Room”, rruga Skënderbej, Tiranë, në këtë edicion të parë Çmimi i Parë, iu dha nga Prof. Diana Kastrati, Zj.Ilina Sancineti me motivacionin: Për tregimin “L’appartenenza” ku ka ditur të realizojë arketipe antropologjike e kulturore të botës arbëreshe, duke i ndërthurur këto dëshmi me rievokime vetjake të trashëgimisë lirike dhe gojore të përfshira në një fabul letrare origjinale. Çmimin e dytë e ndau z. Alessandro Ruggiero, i cili iu dha Z. Nicola Scalici nga Hora e Arbëreshëvet, Sicili me motivacionin: Për tregimin “Akkordeon” në të cilin ka arritur të ndërthurë aktualitetin me frymën muzikore të kulturës arbëreshe, duke i kushtuar edhe reflektime të rëndësishme traditës kulinare të ëmbëlsirave të Horës së Arbëreshëvet (Piana Degli Albanesi).
Çmimi i tretë për Z. Mario Calivà u prezantua nga Fabio Rocchi me motivacionin: Për tregimin “Mushku” në të cilin ka arritur të japë prova të prekshme të qëndrueshmërisë së kulturës arbëreshe përmes përdorimit të arbërishtes, duke shpërfaqur edhe lidhje jetike me traditën letrare italiane.
