Qendra e Studimeve dhe Publikimeve për Arbëreshët (QSPA) shpall konkursin:
“Krenarbëria: Poezi arbëreshe”
Qëllimi i këtij konkursi, që realizohet për të dytin vit radhazi, është mbështetja e krijimtarisë artistike të të rinjve arbëreshë në fushën e poezisë me objekt vetë botën arbëreshe, duke nxitur dygjuhësinë si mjet shprehës, por edhe si element frymëzimi për paraqitjen e historisë, jetës dhe të aspekteve të ndryshme të trashëgimisë arbërore.
Tematika: “Pa të kaluarën, s’ka të tashme – Pa arbërishten nuk ka arbëreshë”
Kjo temë bosht vjen si rezultat i rrezikut që i kanoset arbërishtes në ditët e sotme, përballë sfidave të globalizmit, ku gjithnjë e më tepër po bie numri i fëmijëve dhe i të rinjve që e mësojnë dhe trashëgojnë këtë gjuhë.
Përballë kësaj situate, kanë reaguar edhe studiuesit ndërkombëtarë, duke e përfshirë arbërishten në Atlasin e gjuhëve në proces zhdukjeje (UNESCO) dhe duke e përcaktuar atë si “gjuhë përfundimisht në rrezik”.
Me anë të konkursit të sivjetmë, QSPA synon të kthejë vëmendjen e të rinjve arbëreshë në këtë pasuri të çmuar identitare, të trashëguar prej gati 600 vjetësh ndër breza. Gjuha është pjesa më e rëndësishme dhe e pandashme e identitetit të një populli, me anë të së cilës shprehet shpirti dhe kultura e tij, prandaj shpresojmë të kemi sa më shumë poezi të bukura brenda kësaj tematike.
Kriteret e pjesëmarrjes:
- Pjesë e konkursit mund të bëhen të gjithë të rinjtë e moshës 18 deri në 45 vjeç.
- Pjesëmarrësit duhet të jenë me origjinë arbëreshe, ose t’i përkasin komunitetit arbëresh.
- Tematika e konkursit duhet të respektohet në poezi, qoftë edhe në mënyrë të tërthortë.
- Krijimet duhet të jenë origjinale dhe të pabotuara më parë.
- Poezitë preferohet të shkruhen në arbërisht, ose mund të shkruhen në italisht, por me kushtin që, të paktën 20% e fjalëve, të jenë në gjuhën arbëreshe.
- Krijimet duhet të dërgohen në adresën: krenarberia.qspa@gmail.com
- Afati i dorëzimit është data 21 maj 2025.
- Poezitë duhet të shoqërohen me një bio të shkurtër të autorit (duke përfshirë një dokument identiteti të skanuar).
Shpërblimet:
Fituesi i çmimit “Krenarbëria”, përzgjedhur nga një juri prej profesionistësh, do të marrë trofeun e realizuar enkas për këtë çmim.
Dy poezitë më të mira, së bashku me poezinë e çmimit kryesor, do të publikohen me një koment në revistën studimore “Continuum- Revistë e studimeve arbëreshe”.
Shpallja e çmimit do të bëhet më 30 maj, ndërsa ceremonia e dhënies së çmimit do të mbahet në fillim të muajit qershor.
Bëhuni pjesë e garës!
