Një delegacion shqiptar, i përbërë nga anëtarë të Komisionit për Politikën e Jashtme në Kuvendin e Shqipërisë dhe përfaqësues të Qendrës së Studimeve dhe Publikimeve për Arbëreshët, përkatësisht nga drejtoresha ekzekutive e QSPA-së, prof. Diana Kastrati dhe anëtarja e stafit, Adriana Pilaca kanë nisur sot takimet zyrtare me drejtues të institucioneve vendore dhe akademike në ngulimet arbëreshe në Itali.
Në ditën e parë të vizitës, delegacioni shqiptar ka zhvilluar një takim të gjatë e miqësor me Presidentin e Rajonit të Kalabrisë, Z. Roberto Occhiuto. Në fjalën e saj, drejtoresha ekzekutive e QSPA-së, prof. Diana Kastrati ka theksuar se “studimet për arbëreshët kalojnë ekskluzivisht nga komunitetet e Kalabrisë, ku ekziston numri më i madh i arbëreshëve (mbi pesëdhjetë për qind) dhe ku përveç krizës gjuhësore, trashëgimia letrare, historike dhe antropologjike është e paprekur. Për këtë arsye ne e konsiderojmë si prioritet bashkëpunimin me bashkitë, shoqatat, studiuesit individualë, shkollat dhe universitetet”.
Për këtë arsye, ajo ka propozuar realizimin e marrëveshjenve të bashkëpunimit mes Rajonit të Kalabrisë dhe Tiranës, përkatësisht QSPA-së, për një intensifikim më të thellë të marrëdhënieve kulturore dhe arsimore mes dy vendeve.
Pritet që takimet zyrtare të delegacionit shqiptar të vijojnë edhe në institucione të tjera deri me datë 20 qershor.
