Më datë 6 qershor, ora 19.00, në Amfiteatrin e Akademisë së Arteve të Bukura në Tiranë, Qendra e Studimeve dhe Publikimeve (QSPA), organizon koncertin recital të kantautorit të mirënjohur arbëresh Santino de Bartolo.
Ky koncert recital vjen në vijim të aktiviteteve kulturore, që QSPA organizon me qëllimin për të promovuar gjuhën dhe kulturën arbëreshe në vendin amë, me një planifikim të mirëorganizuar prej tashmë 4 vjetësh .
Kantautori arbëresh Santino de Bartolo do të interpretojë për artdashësit disa nga këngët e tij më të mira, të cilat janë bazuar kryesisht në tekstet e shkruara nga poeti Domeniko Bellizi (Vorea Ujko). Ky koncert vjen si një homazh për figurën e shkrimtarëve Vorea Ujkos, por edhe Dritëro Agollit, të cilët me miqësinë e tyre arritën ta afrojnë Arbërinë me tokën mëmë.
Recitali do të zhvillohet me ndërhyrjen e studiuesve të qendrës, Prof. Diana Kastrati, Dr. Jolanda Lila dhe Dr. Fabio Rocchi. Në të do të marrin pjesë Xhevat Limani, Laert Vasili, Meri Dishnica dhe Klodi Kadillari. Do të jenë të pranishme në mënyrë miqësore, këngëtaret Myfarete Laze dhe Liljana Kondakçiu, si dhe Sofia Kola dhe Carlo Pellicano.
Qendra e Studimeve dhe Publikimeve për Arbëreshët (QSPA), Ju mirëpret!
