Qendra e Studimeve dhe Publikimeve për Arbëreshët (QSPA) ka realizuar marrëveshje bashkëpunimi me Qendrën Ndërkombëtare Ndëruniversitare CISVA, pjesë e së cilës janë universitete të shumta të Italisë dhe Europës Lindore, mes të cilave edhe Universiteti i Tiranës.
Koordinatorja shkencore e CISVA-s, prof. ssa Giovanna Scianatico dhe drejtoresha ekzekutive e QSPA-së, prof. Diana Kastrati kanë nënshkruar virtualisht marrëveshjen e bashkëpunimit ndërinstitucional.
Kjo është hera e parë që një qendër kërkimore-shkencore shqiptare bëhet pjesë e rrjetit ndërakademik ndërkombëtar, Centro Interuniversitario Internazionale di Studi Sul Viaggio Adriatico, me seli në Bari të Italisë.
Pritet që pas kësaj marrëveshjeje, QSPA-ja të ketë mundësi të shfrytëzojë plotësisht literaturën shkencore të CISVA-s, si dhe të bashkërendojë punën për përfshirjen në projekte të përbashkëta ndërakademike ndërkombëtare.
Kjo qendër parashikon përfshirjen e institucioneve akademike dhe studimore të vendeve që lagen nga deti Adriatik për të studiuar pikërisht kulturën, gjuhën, letërsinë, traditat e secilit prej vendeve përqark Adriatikut. Deri tani, pjesë e këtij rrjeti akademik janë: L’Università degli Studi di Lecce, L’Università degli Studi di Bari, L’Università degli Studi del Molise, L’Università degli Studi di Trieste, L’Università degli Studi di Banja Luka, L’Università degli Studi di Zadar, L’Università degli Studi di Tirana, la Regione Puglia dhe tashmë, është përfshirë në këtë rrjet edhe Qendra e Studimeve dhe Publikimeve për Arbëreshët.
