Sot në mjediset e Qendrës së Studimeve dhe Publikimeve për Arbëreshët (QSPA), u krye takimi me znj. Ornela Radovicka, e cila solli një sasi librash të studiuesit arbëresh Papas Antonio Bellusci, bashkëpunëtore e të cilit është prej shumë kohësh. Këto libra u dhuruan me dedikimin e vetë zotit Bellusci.
Ai është një ndër protagonistët më në zë të universit arbëresh, me një kontribut prej shumë dekadash, të fokusuar në dokumentimin e elementeve etnografike, foklorike, kostumografi etj. Ndër të tjera nënëvizohet kontributi i tij tejet i çmueshëm në lidhje me themelimin dhe drejtimin e revistës “Lidhja” (L’unione), e cila kishte jetëgjatësi prej 24 vitesh, dhe u botua në letër e më tej edhe në variantin online nga vitit 1980-2004, deri në momentin që realizimi i saj nuk u bë më i mundur për shkaqe financiare. Librat e dhuruara QSPA titullohen: “Antoni Bellusci: Udhëtimi i një arbëreshi”, “Antologji arbëreshe. Prozë dhe poezi gojore”, “Antologjia arbëreshe”, “Magia, miti e credenze popolari”, “Il telaio”. Zonja Radovicka u prit nga Drejtoresha Ekzekutive e QSPA, Prof. Diana Kastrati dhe stafi i qendrës, që i përcollën mirënjohjen dhe nderimin ndaj figurës dhe kontributit të Papas Bellusci për punën e palodhur të tij dhe përkushtimin ndaj dokumentimit të trashëgiminë e larmishme kulturore të arbëreshëve.
Me shumë rëndësi ishte mesazhi që iu përcoll zotit Bellusci për të mirëpritur një pjesë të arkivit të tij si dhuratë për QSPA, atëherë kur ai do ta shohë të mundshme. Këtij autori i është kushtuar vëmendje e veçantë nga ana e QSPA, e ndaj në mbledhjen e datës 2 korrik, Këshilli Koordinues miratoi ndër të tjera edhe botimin brenda vitit 2020 të një prej studimeve të Belluscit, në një libër që do të mbajë titullin ʺNjë rrugëtim në ngulimet arbëresheʺ, një përmbledhje nga pikëpamja antropologjike dhe fizike e Arbëreshëve të Italisë së Jugut.
Albanian 
English 