Qendra e Studimeve dhe Publikimeve për Arbëreshët (QSPA) do të organizojë nesër, me datë 10 dhjetor 2020, ora 11.00 veprimtarinë e radhës me temë: “100-vjetori i poetit arbëresh Lluka Perone”. Ky aktivitet online realizohet në kuadër të promovimit të figurave të shquara arbëreshe nga QSPA, në bashkëpunim me departamentin e letërsisë të Fakultetit të Historisë dhe të Filologjisë në Universitetin e Tiranës.
Në qendër të kësaj veprimtarie do të jetë biseda me dy studiuesit e mirënjohur të letërsisë Prof. dr. Ymer Çiraku dhe Prof. Dr. Sadik Bejko, të cilët kanë botuar prej vitesh studime mbi letërsinë arbëreshe në përgjithësi dhe për veprën e Lluka Perones në veçanti.
Sjellim në vëmendje disa të dhëna mbi veprimtarinë e Lluka Perones, i cili lindi në katundin arbëresh Ejaninë, në krahinën e Kalabrisë, më 1920. Perone kreu studimet e larta për drejtësi dhe për gjuhë frënge. Punoi për një kohë si profesor i gjuhës dhe i letërsisë frënge. Deri në fund të jetës mbeti një nga intelektualët arbëreshë më aktivë. Ishte mbledhës, studiues dhe botues i zellshëm i folklorit arbëresh, duke pasur bashkëpunim të ngushtë edhe me Institutin e Gjuhës dhe Letërsisë Shqipe të Universitetit të Romës, që drejtohej prej shumë vitesh nga Ernest Koliqi.
Botoi vëllimin me përralla të mbledhura arbëreshe “Novelistika italo-arbëreshe”. Nëpër vite të ndryshme, ka botuar disa libra me poezi si: “Lule Shkëmbi”, “Dërrudhëz”, “Vjershë lirie”, “Thierja e armit”. Gjithashtu, studime e poezi botoi edhe në revistën e njohur letraro-kulturore Shêjzat, e cila botohej në Itali.
