Qendra e Studimeve dhe Publikimeve për Arbëreshët (QSPA) organizoi sot, me datë 28 tetor 2020, veprimtarinë përkujtimore me titull: “Arbëreshi i shquar Emanuele Giordano”- Përkujtimore në 100-vjetorin e lindjes. Në këtë veprimtari diskutimi online merrnin pjesë nipi i tij, gazetari dhe poeti Agostino Giordano, i cili është themelues dhe drejtor i revistës “Jeta Arbëreshe”, nënkryetari i Bashkisë së Tiranës Z. Andi Seferi, drejtoresha ekzekutive e QSPA-së, Prof. Diana Kastrati së bashku me stafin që drejton, si dhe bashkëpunëtorët e jashtëm të kësaj Qendre, prof. Klara Kodra dhe prof. Emil Lafe.
Pas përshëndetjeve të rastit nga drejtuesit e institucioneve respektive, fjalën e mori gazetari Agostino Giordano, i cili solli të dhëna interesante mbi profilin njerëzor dhe profesional të kësaj figure. Ai veçoi natyrën e thjeshtë e tepër të përulur të At Emanueles, i cili gjithë jetën e vet ia kushtoi përhapjes së gjuhës arbëreshe si në ritet kishtare dhe përhapjen e meshës, po ashtu edhe në përvijimin e një sërë fushash filologjike, duke botuar për herë të parë “Fjalorin e Arbëreshëvet të Italisë”, “Gramatikën e gjuhës arbëreshe”, si dhe botoi një sërë artikujsh divulgativ e shkencor në shtypin periodik të kohës, veçanërisht në “Shejzat” e Koliqit. Në këtë kuadër, në mënyrë kronologjike, ai bëri edhe një sintezë të marrëdhënieve që Emanule Xhordano pati me botën shqiptare.
Duke falënderuar Qendrën e Studimeve dhe Publikimeve për Arbëreshët (QSPA) për nismën që ndërmori në lidhje me propozimin për emërtimin e një rrugë me emrin “Emanuele Giordano”, si dhe Bashkinë e Tiranës për miratimin e saj, ai tregoi se qytetit qysh fëmijë mësoi për qytetin e Tiranës, përmes At Emanueles. Në fund, të veprimtarisë, u bënë propozime të shumta për hapësirat e bashkëpunimit, ku në parim u vendos që bashkëpunimi të jetë i shumëfishtë, si në botimin e dorëshkrimeve të At Emanueles, të cilat janë kryesisht përkthime nga greqishtja apo italishtja në arbërisht, si dhe vënia në dispozicion të studiuesve të QSPA-së e materialeve të ndryshme, të botuara kryesisht në revistën “Jeta Arbëreshe”, të cilat përbëjnë një korpus të gjerë të dhënash mbi gjuhën, letërsinë dhe folklorin arbëresh.
Dita Botërore të Librit dhe të Drejtës së Autorit
Në kuadër të Ditës Botërore të Librit dhe të Drejtës së Autorit, sot më 23 prill pranë Fakultetit të Historisë...