Përmendim sot me rastin e 84-vjetorit të lindjes kontributin studimor e letrar të akademikut Rexhep Qosja. Ai lindi në Vuthaj (Mali i Zi) në vitin 1936. Kreu Shkollën Normale në Prishtinë dhe po aty, përfundoi edhe studimet e larta në degën e gjuhës shqipe e të letërsisë. Ka punuar si këshilltar shkencor i Institutit Albanologjik të Prishtinës dhe profesor ordinar i Fakultetit Filologjik. Ka qenë përgjegjës i degës së letërsisë shqipe pranë këtij fakulteti, kryeredaktor i revistës “Jeta e re” dhe për shumë vjet drejtor i Institutit Albanologjik të Prishtinës (1972–1981).
Objekti i punës shkencore të Qosjes është i gjerë; në të përfshihen letërsia kombëtare e Shqiptarëve në prirjen e saj diakronike dhe sinkronike, në trojet etnike dhe në diasporë, probleme të periodizimit të saj dhe proceset bashkëkohore të jetës letrare, kulturore dhe mendore të Shqiptarëve, të zhvillimit të gjuhës shqipe dhe të rolit të shkrimtarëve në këtë mes, albanologjia dhe në mënyrë të veçantë një nga degët më të reja të saj, historiografia letrare dhe aspekte metodologjike të zhvillimit të saj dhe të kritikës.
Ai është marrë posaçërisht edhe me studimin e Romantizmit tek Arbëreshët e Italisë, si dhe me identifikimin dhe përfshirjen e autorëve arbëreshë në veprën mbi historinë e letërsisë shqipe.
Është anëtar i jashtëm i Akademisë së Shkencave të Shqipërisë; është dekoruar me Urdhrin “Nderi i Kombit”.
