Drejtoresha ekzekutive e Qendrës së Studimeve dhe Publikimeve për Arbëreshët (QSPA), prof. Diana Kastrati ka zhvilluar një vizitë studimore në Arkivin e shtetit të Venecias dhe në Bibliotekën e Fondazione Querini Stampalia. Gjatë kësaj vizite studimore njëjavore, Prof. Kastrati është udhëhequr nga studiuesja e mirënjohur Lucia Nadin, emri i së cilës shenjon ngritjen e siparit të një kohe të re studimesh të historisë tonë me Republikën e Serenessima-s, ku ka spikatur me një sërë librash studimorë, mes të cilëve me nxjerrjen në dritë të Statuteve mesjetare të Shkodrës.
Prof. Kastrati, gjatë kësaj vizite ka hedhur piketat për disa nga aspektet studimore të patrajtuara dhe ka krijuar një databazë me disa nga materialet e pashfrytëzuara që hedhin dritë mbi marrëdhëniet shqiptaro-veneciane.
