Një grup pune nga Qendra e Studimeve dhe Publikimeve për Arbëreshët (QSPA) ka nisur prej datës 12 qershor një ekspeditë studimore në komunitetet arbëreshe në Italinë e Jugut (Kalabri), e cila do të zgjasë deri me datë 2 korrik 2022. Në përbërje të këtij grupi pune janë tre studiues të Qendrës së Studimeve dhe Publikimeve për Arbëreshët (QSPA), përkatësisht dr. Silvana Nini, dr. Dorina Arapi dhe dr. Etmond Cane.
Në përshtatje me profilin studimor të secilit studiues, objekti kryesor i punës studimore në terren është i përqendruar në tri aspekte:
1. Vlerësim i situatës gjuhësore në zonat arbëreshe.
2. Ndikimi i politikave kulturore tё shtetit komunist shqiptar nё komunitetin arbёresh.
3. Ritet dhe praktikat kulturore në komunitet e Arbëresheve të Italisë së Jugut.
Deri më tani, ata kanë kryer intervista e vëzhgime në terren në ngulimet arbëreshe Spezzano Albanese, San Demetrio Corona (Shen Mitri) dhe San Cosmo (Strigari).
Pritet që deri në fund të ekspeditës studimore të zhvillojnë hulumtime në terren për shumicën e vendbanimeve arbëreshe në Kalabri.
