Këshilltari për Arsimin dhe Punën në rajonin e Pulias, Z. Sebastiano Leo ka zhvilluar sot një vizitë zyrtare në mjediset e Qendrës së Studimeve dhe Publikimeve për Arbëreshët (QSPA). Përveç tij, në këtë takim ishin të pranishëm edhe Z. Noé Andreano, (Sindaco (kryebashkiak) në Casalvecchio të Pulias), Znj. Maria Raffella Lamacchia (Drejtoresha e Seksionit për Arsimin dhe Universitetin në Rajonin e Pulias), Z. Lino Manosperta, Përgjegjës i Zyrës së Projekteve – TPP – Konsorciumi Rajonal për Artin dhe Kulturën e Pulias, Prof. as Diana Kastrati drejtoresha ekzekutive e QSPA-së, si dhe stafi i Qendrës së Studimeve dhe Publikimeve për Arbëreshët.
Gjatë takimit, drejtoresha ekzekutive e QSPA-së, prof. as. Diana Kastrati i njohu të pranishmit me botimet e deritanishme dhe me disa nga veprimtaritë e zhvilluara deri më tani nga ky institucion, i cili është i vetmi në trojet shqiptare që është i specializuar për studimin e historisë, gjuhës dhe letërsisë arbëreshe.
Gjithashtu, u diskutuan dhe shqyrtuan në terma konkretë mundësitë e bashkëpunimeve ndërinstitucionale, të cilat përkojnë si me objektin dhe qëllimin e punës së QSPA-së e po ashtu, edhe me vëmendjen dhe punën që i kushton Rajoni Pulias ruajtjes dhe promovimit kulturor të komunitetit arbëresh aty.
Në fund të takimit, palët u dakordësuan për realizimin e disa objektivave, ku më kryesoret përmendim disa nga planet afatshkurtra, të tilla si:
– Nënshkrimi i marrëveshjes së bashkëpunimit midis QSPA-së dhe Rajonit të Pulias
– Organizimi i një festivali për vitin 2023, i cili do të ketë në fokus muzikën dhe kulturën arbëreshe.
Ndërsa ndër projektet afatgjata, u diskutua mundësia e bashkëpunimit për ngritjen e “Shtëpisë së Arbëreshëve” në Tiranë, si dhe realizimi i projekteve të përbashkëta në fushën e kulturës dhe të gjuhës arbëreshe në përgjithësi.
