Qendra e Studimeve dhe Publikimeve për Arbëreshët (QSPA), pas rreth dy vitesh aktivitet merr pjesë në Panairin e 25-të të Librit “Tirana 2022”, që vijon festën e librit në ditën e dytë e tij në mjediset e Pallatit të Kongreseve.
Në këtë dalje të parë të saj QSPA sjell pranë lexuesve botimet e realizuara këto dy vite, ku ndër titujt kryesorë përmendim “Vepra historiko-filologjike e De Radës”, “In memoriam”, kuruar nga Prof. Jup Kastrati (2020); “Santori, poet dhe dramaturg” botim monografik i studiueses së letërsisë arbëreshe, prof. Klara Kodra (2020); “Një rrugëtim në ngulimet arbëreshe”, me autorë Papas Antonio Belushi dhe Ornela Radovicka (2020); “Një rrugëtim etnografik mbi kostumet e Arbëresheve të Italisë së Jugut”, monografi e studiueses së QSPA-së, Silvana Nini (2020); revista “CONTINUUM”, Nr. 1- Revistë e Studimeve Arbëreshe, botim shkencor i QSPA, Tiranë 2020-2021; botim i FEL, QSPA-FEL, Konferenca Ndërkombëtare: “Endangered Languages and Diaspora”. XXV Annual Conference – Proceedings, Foundation for Endangered Languages and Center for Research and Publications on Arbëresh (16-19 dhjetor, Tiranë 2021); “Histori e letërsisë shqipe”, Giuseppe Schirò Junior, përkthyer e kuruar nga Dhurata Shehri (2021); “Bija e mallkuar”, F. Anton Santori, përkthyer e kuruar nga Klara Kodra (2021); “Dhimitër Kamarda- Për një shqipe” të gjithakushme edhe të gjithakundme & të tjera vepërza” me një studim krahasues, përgatitur nga profesor Dhori Q. Qiriazi (2021); “Studime arbëreshe” përmbledhje e artikujve studimorë të Maximilian Lambertz-it mbi arbëreshët: (Të folmet shqipe në provincën italiane Kampobasso dhe Foxha (Molize)”, (të folmet shqipe në Itali) “Jul Variboba”, përkthyer nga origjinali gjermanisht nga Genc Lafe, me pasthënie nga Prof. Emeritus Emil Lafe (2021); “Kolonitë arbëreshe të Italisë dhe letërsia e tyre”, Michele Marchianó, përkthyer nga origjinali italisht nga Elda Katorri (2021); “Mbi origjinën, zakonet dhe gjendjen e tanishme të shqiptarëve të Mbretërisë së Napolit”, Angelo Masci, përkthyer nga origjinali italisht nga Edmond Çali (2021); “Përmbledhje studimesh,
Kuvendi i Parë Ndërkombëtar: Gjendja aktuale e studimeve mbi arbëreshët” (27-29 shtator 2021), përmbledhje kumtesash. Konferenca shkencore “Arbëreshët në fokusin e shtetit shqiptar”, QSPA&Instituti i Historisë, ASA, (19 nëntor 2021), si dhe revista “CONTINUUM”, Nr. 2. Përmbledhje artikujsh për arbërishten në shqip nga konferenca e dhjetorit 2021, QSPA-FEL.
Ftesa mbetet e hapur për të gjithë lexuesit dhe studiuesit të vizitojnë stendën e QSPA në ditët në vijim deri ditën e diel më 20 nëntor, pranë Pallatit të Kongreseve në katin e parë, majtas me hyrjen kryesore.
