Ditën e sotme, datë 12.12.2022 në ambientet e Qendrës së Studimeve dhe Publikimeve për Arbëreshët (QSPA) u zhvillua një takim në kuadër të radhës së monitorimeve institucionale që kryen Komisioni për Edukimin dhe Mjetet e Informimit Publik.
Në takim ishin të pranishëm 14 anëtarë të Komisionit për Edukimin dhe Mjetet e Informimit Publik, të cilët në kuadër të kontrollit mbi veprimtarinë e ministrive dhe të organeve në varësi të tyre, shprehën interes paraprak për veprimtarinë, krijimin, shtrirjen e kontakteve dhe botimeve të QSPA. Drejtoresha Ekzekutive e Qendrës së Studimeve dhe Publikimeve për Arbëreshët (QSPA), prof. Diana Kastrati parashtroi veprimtarinë e zhvilluar nga Qendra në harkun kohor të këtyre tre viteve, duke theksuar tre hullitë në të cilat është i orientuar misioni i qendrës, ku konkretisht janë: kërkimi shkencor, botimet dhe përhapja e kulturës arbëreshe. Më tej, u vijua me pyetje që u shtruan nga anëtarët e këtij komisioni, të cilat morën përgjigje nga Drejtoresha Ekzekutive, prof. Diana Kastrati dhe u dhanë disa sugjerime mbi punën në vijim.
Takimi u mbyll me përgëzimet e anëtarëve të këtij komisioni mbi veprimtarinë dhe punën e bërë nga QSPA.
