Sot u zhvillua mbledhja e radhës së Këshillit Koordinues të Qendrës së Studimeve dhe Publikimeve për Arbëreshët (QSPA).
Këshilli Koordinues i Qendrës së Studimeve dhe Publikimeve për Arbëreshët diskutoi dhe miratoi çështjet vijuese:
Së pari, u miratua dhe legjitimua Këshilli Akademik Teknik Propozues mbi Botimet, i përbërë përkatësisht nga prof. Emil Lafe, prof. Ymer Çiraku dhe prof. Vjollca Osja.
Së dyti, u miratuan librat studimorë që do të botohen nga QSPA përgjatë vitit 2020, duke u dhënë edhe një sërë sugjerimesh mbi përmirësime të mundshme të tyre. Librat e miratuar për botim janë, si vijon:
📖 “Komedi dhe melodrama të Santorit”, përgatitur dhe pajisur më shënime filologjike nga prof. Klara Kodra. Libri sjell për herë të parë krijimet në këto dy zhanre të Anton Santorit, të cilat janë të panjohura për studiuesit dhe publikun shqiptar.
📖 “Vepra historiko – filologjike dhe publicistike e De Radës”, përkthyer nga prof. Jup Kastrati. Vepra është një përmbledhje e shkrimeve me karakter filologjik dhe historik të De Radës, të shkruara në italisht në organe të ndryshme të kohës.
📖 ʺNjë rrugëtim në ngulimet arbëresheʺ nga Anton Bellusci, është një përmbledhje nga pikëpamja antropologjike, fizike e Arbëreshëve të Italisë së Jugut.
📖 “Një rrugëtim etnografik mbi veshjet e Arbëreshëve të Italisë së Jugut” do të realizohet me kontributin e studiueses së QSPA-së, Dr. Silvana Nini. Vepra sjell të strukturuar në vizatime tipologjinë e veshjes arbëreshe dhe do të pajiset edhe me një fjalorth terminologjik mbi këtë lëmi.
Së treti, u konfirmua nga përfaqësuesja e Ministrisë së Punëve të Jashtme, Znj. Mira Hoxha se është në proces finalizimi plotësimi i Këshillit Koordinues të QSPA-së me dy përfaqësuesit e komunitetit të Arbëreshëve të Italisë.
