49 vjet më parë u nda nga jeta Karl Gurakuqi, i cili është i njohur si gjuhëtar, letrar, gazetar, autor tekstesh, përkthyes. U lind në Shkodër, më 24 mars 1895 dhe vdiq më 6 dhjetor 1971 në Bresanone të Italisë.
Në mërgim, 20 vjet i kaloi në Siçili, në Palermo. Dëshira e tij ishte të merrej me studimin e gjuhës shqipe dhe të vazhdonte pasionin si mësimdhënës. Dhe e gjeti veten tek arbëreshët e Sicilisë. I ftuar nga filologu arbëresh Rosalin Petrota la Austrinë dhe mori udhën për në Palermo dhe menjëherë u aktivizua pedagog i gjuhës shqipe në Universitet. Këtu bashkëpunoi edhe me Gaetano Petrotën dhe Atë Zef Valentinin, u mor me punë kërkimore-shkencore pranë katedrës së albanologjisë, dha mësim në kurse të veçanta për gjuhën shqipe dhe kulturën shqiptare me mësuesit arbëreshë. Ai ka qenë ideator dhe bashkëthemelues i Qendrës së Studimeve Shqiptare në Palermo. Së bashku me Petrotën dhe Valentinin organizuan katër kongrese ndërkombëtare të studimeve shqiptare.
