Sot është 10-vjetori i ndarjes nga jeta të një prej figurave më të njohura të botës arbëreshe, imzot Eleuterio Fortino, drejtuesi i “Shoqatës Kulturore Besa”, e cila shërbente si një pikë referimi e të gjithë arbëreshëve në Itali. Pas rënies së regjimit komunist, fillimit të emigracionit dhe hapjes së Shqipërisë, shoqata “Besa” u shndërrua në një vendtakimi i të gjithë shqiptarisë.
Veprimtaritë e kësaj shoqate, përherë e më shumë, u bënë një pikëpjekje kulturore e të gjithë shqiptarëve. Imzot Eleutero Fortino ishte vëllai i profesorit Italo Fortino, që për shumë vite ka qene titullar i Letërsisë Shqipe në Institutin Oriental të Napolit. Ai ishte nënsekretar i Këshillit Papnor për nxitjen e bashkimit ndërmjet të krishterëve, me një përvojë të jashtëzakonshme në lëmin e dialogut midis tyre. Veprimtaria e tij fetare është tejet e pasur, por arrin kulmin e saj me rolin e tij si promovues i marrëdhënieve me ortodokset, pasi u vendos në Romë nga mesi i viteve 1960. Për rolin e arkimandritit imzot Eleuterio Fortino në kuadrin fetar kanë shkruar shumë organe shtypi.
Një artikull të veçantë i kushtoi edhe gazeta “Osservatore Romano”, që e cilësoi me titullin domethënës “Memoria historike dhe shpirti i lëvizjes ekumenike”. Në gazetën e Vatikanit imzot Fortino kishte shkruar artikuj të panumërt, duke i kushtuar vëmendje temave të dialogut të ndërkrishterë dhe të ekumenizmin shpirtëror. Ishte një nga njohësit më të mirë të Shqipërisë, Ballkanit dhe Evropës lindore.
Burimi origjinal: http://www.shqiptariiitalise.com/itali/itali/itali/nderron-jete-imzot-eleuterio-fortino.html?fbclid=IwAR0ZvKnq5Q0DdRaZbTAOwGtPZ37vXDI53HBq5ot94Gv_P0Lpquxeuzr6YGQ
